L'orixe de la Colección de la Guerra Civil del Muséu Etnográficu de Grau foi productu d'un cúmulu de circunstancias que la favorecían ya, incluso, la requerían.

Por una parte, l'Ayuntamientu de Grau, en collaboración cola Asociación pa la Recuperación de l'Arquitectura Militar Asturiana 1936/37 (ARAMA 36/37), acababa de finalizar la organización d'una ruta que percorría la mayor parte de las fortificaciones de la Guerra Civil que sobrevivieran nel conceyu ya las personas que comenzaban a visitala, solían demandar más información ya detalles sobre las mismas, polo que yera aconseyable disponer d'un sitiu onde poder atendelas.

Por otra parte, ARAMA facía escasu tiempu ficiérase depositaria d'una interesante  colección de mediu centenar de piezas apaecidas nel desescombro, previo a la sou reconstrucción, del que fora Cuartel de Simancas de Xixón, yá qu'el Colexu de la Inmaculada, establecíu nel inmueble reedificáu, conservara n'esposición al públicu, anque restrinxida a la solicitú de la oportuna cita. Mas, ensin desear n'actualidá continuar con esa servidumbre, El Colexu comenzó una serie de xestiones col fin de desfacese de las piezas, aprovechando entonces ARAMA la circunstancia pa tomar al sou cargu el llegáu, alcontrándose nesi momentu a la busca d'un sitiu onde poder exhibilu públicamente. A ello añadíase qu'el Muséu Etnográficu de Grau, que yá disponía ente los sous fondos d'algunos oxetos relacionaos d'una ou outra forma cola guerra civil, taba rehabilitando trés salas nuevas a las que entá nun se-ys asignara un conteníu definíu; siendo asina cómo ARAMA propunxo al Ayuntamientu dedicar las nuevas salas a cubrir las necesidaes d'una mayor información sobre la Guerra Civil, que nos taban demandando, prestándose l'Asociación, a organizar por separtáu n'ellas, catalogar ya xestionar los oxetos preexistentes nel Muséu ya a engrosar el sou númberu colos yá citaos procedentes del Cuartel de Simancas, alcontrándose asina en posición d'ufiertar un volume de fondos suficiente pa efectuar una apertura digna. Toas estas circunstancias facían de l'ampliación del Muséu el sitiu idóneu pa completar la información a los visitantes qu'acababan de facer la ruta ou taban a punto d'iniciala, con mapas, fotografías, testos diagramas ya incluso, oxetos que-ys dexaran nidia la visión de lo que foi la Guerra Civil en Grau.      

La composición  d'estos fondos iniciales dio llugar a dos cambios. El primeru foi una modificación nel nome del Muséu, que pasó a ser Muséu Etnográficu ya HISTÓRICU de Grau. El segundu consistió nuna variación de la primitiva idea del discursu, que sólo aspiraba a "contar" la Guerra en Grau, porque nesi momentu la mayoría de las piezas procedía d'outra población -Xixón- ya d'un fechu históricu qu'ocurriera, colo cual la aún non nata esposición designóse como Colección de la Guerra Civil N'ASTURIAS del Muséu Etnográficu ya Históricu de Grau.

A pouco d'entamar l'andadura, l'Asociación de Recreacionismu "Frente del Nalón" expresó'l sou deséu de cooperar a la xestión de la nueva colección del Muséu, propuesta esta que acéptase polo cuantioso ya bono que podía aportar, firmándose los oportunos convenios.

A los materiales iniciales ya a los qu'agora aportaba "Frente del Nalón" sumaríanse en goteru incesante outros munchos cedíos, por una parte, polos vecinos del conceyu que, deseosos d'enriquecer el sou Muséu, foron trayéndonos oxetos relacionaos cola guerra civil que guardaban nas sous casas ya dependencias ya, por outra, munchos de los socios d'ARAMA, nel sou afán por cooperar, aportaron a títulu personal piezas qu'encontraran nas salidas, ya de trabayu, ya d'espansión, de l'Asociación.

Col agora yá notable volume de materiales reuníos organizóse la Colección ente las trés salas disponibles con un criteriu que, si bien nun ya estrictamente rigurosu, marca claramente la idea que-y pretendieron infundir. 

La primera sala dedícase al rellatu de la Guerra Civil en Grau, polo que las piezas que se muestran son procedentes de diferentes sitios d'esti municipiu. Destaca ente ellas la puerta d'un camión semi-blindáu, acribillada polos disparos qu'acabaron inutilizándola; un baste pal tresporte en mulu d'Artillería de montaña ou restos de los proyectiles rusos que disparaba una batería republicana de la mesma procedencia emplazada durante la segunda mitá de la guerra nel frente Sur de Grau, en La Tejera. Asina como una colección de maquetas magistralmente realizadas por él, fallecíu prematura ya lamentablemente, sociu d'ARAMA Rodrigo Álvarez del Llano ya outras dos de fotografías d'escenas bélicas de la época tomadas nel conceyu. Comunicáu con esta sala alcuéntrase un cuarto anejo nel que se recrearon un puestu de mandu instaláu nuna vivienda rural.

La segunda sala dedícase a las fortificaciones construidas n'Asturias durante la guerra. Alcontramos n'ella dos nuevas maquetas del añoráu Rodrigo, elementos de fortificación prefabricaos ya semeyas ya planos d'obras de los distintos frentes de la Rexón. Alcuéntrase tamién n'ella una colección perinteresante de periódicos de la época con noticias puntuales referidas a Asturias. 

 Y, finalmente, la tercera sala, la mayor, alberga piezas d'ambos bandos, convenientemente separadas las que foron privativas d'unu ya outru, destacando con una cierta independencia la colección procedente del Cuartel de Simancas ou la recreación d'un puestu sanitariu de campaña, asina como dos monolitos erixíos n'alcordanza de miembros de la Lexón Cóndor qu'alcontraron la muerte en combate na campaña d'Asturias ya un gran númberu d'oxetos d'interés, como la mira de puntería d'un Junkers Ju.52, restos de bombas d'aviación rusas, empleadas polos republicanos, elementos de piezas d'artillería -la cureña d'un cañón de montaña de 7 cm- asina como gran cantidá de restos de proyectiles... Too ello convenientemente explicáu en trés pantallas electrónicas, que proporcionan al visitante información puntual sobre cada una de las piezas qu'escueya; información que, xunto cola presentada en paneles fixos, permita al interesáu nel tema pasar una agradable tarde na detenida visita a la Colección. 

Artemio Mortera (Presidente d'ARAMA)

Recursos:

Guías Históricas del Conceyu de Grau.

• Ruta de Fortificaciones del Frente de Grau (1936-37)/ Artemio Mortera. Añu 2015 (941 Kb)