L'edificiu

La Casa Cultura esfruta d'un allugamientu privilexáu nel centru la villa, al llau del parque San Antoniu ou Parque d'Abaxo. La construcción primera del palaciu yá del sieglu XV, pero foi remocicáu dafechu nel XVIII. Yá na siguiente centuria, emplegóuse como cuartel pa las tropas napoleónicas, ya nel XX l'edificiu conviértese n'oficina de Facienda ya dempués en Cuartel de la Guardia Civil. 

Nas obras de restauración ya igua como Casa Cultura, descúbrese na planta baxa d'una de las torres un guapu arcu oxival que taba tapecíu por piedras ya sucesivas capas de carga. Esti arcu pertenecería a la torre militar de la primitiva muria medieval de la villa, que sobro los sous muros s'edificóu dempués el palaciu.

El Palaciu Miranda-Valdecarzana presenta una forma cúbica al rodiu d'un patiu central mui espaciosu. Tien cuatro torres, una en cada esquina, de tres plantas. El restu l'edificiu presenta dous pisos, sacantes nel sou llau sur que tien tres porque tien amestada una galería ente las dous torres (güei tresnada como Sala Polivalente). 

La entrada principal allúgase al este, na Cai Cerru la Muralla e/n. De la qu'entramos, de frente tenemos el patiu interior ou claustru. Esti tien ocho altas columnas de sección octogonal que sofitan el corredor de madera del pisu superior. El patiu ta cubiertu con vidrera, pero tien un llamador sistema de recoyida del augua de lluvia que cai a mou de cascada sobre una antigua fonte central. Esti patiu tien accesos a dellas dependencias como la sala d'esposiciones (planta baxa del llau norte), l'Aula de las Metáforas (oeste) ya una sala (sur) au se conserva un espectacular llagar de sidra.

A manzorga de la entrada principal entama una escalera señorial que nos lleva al pisu d'enriba. Nel descansu d'esta escalera alcuéntrase la oficina de dirección ya la secretaría de la Escuela Municipal de Música. Yá nel primer pisu ta la biblioteca ya las aulas de la Escuela Música.