El conceyu de Grau ta situáu na primer orla de conceyos centro-occidentales d'Asturias, quedando la villa moscona, distante de capital uvieína namás 12 minutos, integrada funcionalmente no que se llamóu Área Metropolitana Central d'Asturias. Sicasí la fluidez nas comunicaciones, la orografía del conceyu moscón permitíu qu'esti quede a resguardu de la urbanización difusa irradiada dende'l centru metropolitanu, ya los movíos relieves que s'interponen ente d'ambos enclaves permitieron preservar prácticamente inalteraos los tradicionales rasgos de ruralidá del conceyu, a escepción de la villa de Grau, centru comarcal de servicios alministrativos ya empresariales con marcada impronta urbana.

Comprende'l conceyu 221,16 km2 de superficie que se distribúi ente los montes agrestes del sur del conceyu (el Picu La Berza, 1.454 metros) hasta las amplias veigas bañadas pol Nalón (30 metros), compartimentándose'l territoriu en dellas cuencas hidrográficas drenadas polos ríos Cubia ya Sama, dambos tributarios del ríu Nalón, qu'actúa de llende alministrativa del conceyu al norte.