La evolución histórica de la tierra moscona nun foi ayena, nin nel sou orixe nin na actualidá, a las disponibilidades xeográficas que'l territoriu proporciona. L'amplitú ya fertilidá de las sous veigas, la confluencia de dellos ríos, el pasiyu natural que se conforma ente'l centru ya l'occidente astur, ya'l más estrechu vau sobre'l ríu Nalón de la comarca (Peñaflor), modelaron la historia del concejyu dende'l sou orixe hasta l'actualidá.

Del rápidu aprovechamientu de las sous riquezas quedóu un abundante testimoniu nos asentamientos prehistóricos. Atopáronse dellos vestixos del Paleolíticu Mediu ya Superior, tanto nas terrazas aluviales como nas cavidades calcáreas del conceyu. Los sous castros, de la Edá del Fierru, vincúlanse tradicionalmente a la tribu de los pésicos, qu'ocuparon nesta época'l centru-occidente del país.

Na Alta Edá Media estos dominios son conocíos como'l territoriu de Prámaro ya asina f'oron identificaos hasta que la fundación de la puebla de "Grado" ya'l sou Alfoz, por Alfonso X El Sabiu nel sieglu XIII, reemplazaron la sou primera identidá. Las necesidades de cuntar con una primera etapa nel Camín de Santiagu dende San Salvador d'Uvieo/Oviedo (güei catedral d'Uvieo/Oviedo), la confluencia del Camín Real de la Mesa proveniente de Castiella, ya la fecundidá de las anchas veigas de Prámaro, fixeron d'esta zona l'ideal pa fundar una ciudá cercada por muralla ya dotada de mercáu, marcando pa siempre'l carácter mercantil ya itinerariu de la villa de Grau, ya determinando pa siempre'l llugar pal gobiernu del sou alfoz.

El discurrir de los tiempos permitíu que dalgunas partes del sou primitivu alfoz se segregaran del mesmu - conceyu de Candamu, parroquia de Trubia -, ya qu'outros s'axuntaran - antiguu Cotu Obispal de Peñaflor -, llabrando un destinu común reconocible en murallas ya torreones medievales (cerca de Grau, torres de Villanueva ya Báscones), palacios nobiliarios d'época moderna (Marqueses de Ferrera, Condes d'Agüera, Marqueses de Miranda-Valdecarzana, Marqueses de Fontela), ensanches burgueses (Calles Alonso de Grado, Manuel Pedregal, Cimadevilla), casonas indianas (Capitolio, Villa Julita, Villa Granda, Villa Ramonita, etc.) ya barrios populares (Las Calles Nuevas, El Casal, San Playu, etc.).

Polas mesmas razones estratéxicas, Grau, antesala del occidente astur, foi protagonista de singulares episodios nos conflictos bélicos contemporáneos, destacando los de la Guerra de la Independencia ya la Guerra del 36, que tovía se pueden ver los restos de dellas partes del conceyu (Peñaflor, El Freisnu, Cabruñana).

Sicasí Grau mantiene güei la marca de las sous primixenias tradiciones en múltiples pueblos ya caseríos, onde tovía se conserva un ricu patrimoniu etnográficu ya cultural d'enraigonada esencia asturiana. Sirvan d'exemplu las sous brañas del Altu Cubia, así como la gran abondancia d'horros, paneras, pisones, molinos ya outros inxenios hidráulicos que de manera uniforme se distribúin por tola xeografía moscona.

Mosconas ya moscones. Oríxenes d'un xentiliciu

La razón pola que los habitantes de Grau son conocíos como moscones yá incierta, pero si yá cierto que toos asumen esti xentiliciu con arguyu ya presunción. Preba d'ello son los galardones anuales denominaos "Moscones de Oro", que l'Asociación de Amigos de Grado concede cada añu a las personas ou instituciones que destacaron na sou contribución al progresu ya reconocimientu de la tierra moscona.

Sobre l'orixe del xentiliciu moscón existen dellas hipótesis, nenguna d'ellas confirmada con certeza. Dalgunas remontan las sous raíces a la notoriedá d'una acaudalada familia de la villa na Baxa Edá Media, la familia Mosca, mientras outras faen referencia a las emboscadas contra las tropas francesas nel estrechu pasu de Peñaflor, onde los milicianos de Grau disparaban dende dambos llaos fayendo xiblar las sous balas como "mosconas".

Sea como fora, lo cierto yá que los moscones ya mosconas amuésanse felices col sou xentiliciu, siendo esti usáu ya representáu profusamente como un gordu, nervudu ya peludu moscón, a la mayor gloria de Grau.