Grau, villa de comerciu ya servicios

En Grau, de compras los domingos.

Se dalguna particularidá tien la villa de Grau yá la sou amplia ya enraigonada tradición comercial y'al feichu de que'l comerciu local permaneza abiertu tolos domingos del añu.

Los domingos son tamién día de mercáu en Grau xunto colos miércoles, cuando tamién se celebra¿ ya yá esti día cuando los puestos ambulantes instalaos nas cais ya plazas más céntricas de la villa se xunen al comerciu local nuna animada actividá mercantil na que colores, golores, trasiegos ya conversaciones componen la más pintoresca ya reconocida imaxe de la villa moscona. Paisaxe ya paisanaxe fúndense esti día dominical ente'l frescor de los productos de la rica güerta moscona, el golor del pan d'escanda ya los embutíos de la tierra, los trapos de mil colores ya los artículos más variaos, acompañaos siempre por un comerciu fixu bien surtíu de texíos ya confecciones, ferretería, muebles, decoración, casa, alimentación, etc., ya completáu pola presencia de l'amplia hostelería local, cola sou variada ufierta gastronómica.

Asina, tola villa de Grau se conviértese, domingu a domingu, nun gran centru comercial abiertu, nel que'l cascu históricu se presenta nel meyor marcu p'amosar, a mou de gran escaparate al aire llibre, la cultura ya tradición comercial locales ya que propios ya visitantes, nuevos ya vieyos, disfrutan por igual.
 

Grau, villa d'equipamientos, servicios ya vida social

Al marxe de la ufierta comercial ya empresarial en xeneral de la villa, Grau dispón d'un ampliu abanicu d'equipamientos ya servicios públicos orientaos a que la xente disponga de facilidades pa la sou realización personal ya social.

Destaca particularmente la disponibilidá d'equipamientos deportivos municipales, qu'inclúin campos de fútbol de yerba natural ya artificial, polideportivu, piscina climatizada ya descubierta, campu de rugbi, frontón, pistas de tenis, tiru con arcu, etc. Hasta nueve escuelas deportivas municipales existen na villa, d'ente las que destaca con proyección nacional la práctica del hoquei sobre patinos, na que Grau llegó a disputar la división d'honor.

Outros equipamientos culturales son especialmente destacables ya en particular la sou Casa de Cultura (monumentu declaráu Bien d'Interés Cultural), la sou premiada biblioteca pública col sou complementu de "Aula de las Metáforas" (biblioteca especializada en poesía) ya dous Museos Etnográficos (en Grau ya Sama Grau) con interesantes colecciones d'útiles ya ferramienta tradicionales.

Equipamientos ya servicios educativos, asistenciales, socio-sanitarios, xuveniles, de desarrollu local, etc, completan l'amplia ufierta institucional de la villa de Grau, que queda complementada, en tou casu, cola disponible nel área metropolitana de la rexón con centru n'Uvieo, capital d'Asturias, que tien unas dotaciones fácilmente accesibles por autovía ya ferrocarril.