El queisu afuega'l pitu ya outras artesanías agroalimentarias: "tocinillo" ya pan d'escanda.

Grau gozóu dende siempre d'una gran sonadía ya fama d'ellu son los mercaos que cada miércoles ya domingu eiquí se dan cita ya a los qu'acuden vendedores, colos sous pequeños puestos pa ufrir a los habitantes del conceyu ya visitantes, productos del campu, queisos, miel, pan...

Ente las especialidades gastronómicas con que cuntamos habría que mencionar, el queisu afuega'l pitu (nas sous variedades blancu ya roxu), amás de la sou variedá dulce, la barreña; el pan d'escanda, el "tocinillo de cielo" y l'escaldáu (postre dulce feichu de fariña de maíz, miel ya manteiga).

L'afuega'l pitu yá'l queisu típicu del conceyu de Grau ya, anque se faiga tamién de forma artesana n'outros conceyos del centru interior d'Asturias, Grau yá'l sitiu onde se concentra la mayor parte de las queiserías ya la producción d'esta variedá queisera ya onde se'establez la sé del sou Conseyu Regulador.

El queisu afuega'l pitu debe'l sou nome al sou sabor con un deixe un puntu amargu ya secu na boca, qu'afuega'l pitu (el gargüelu). Existen diferentes variedades según la sou composición ya forma, siendo siempre feichu con cuayu de lleiche de vaca. La sou forma yá troncocónica ou de calabazón (variedá de trapu) ya adopta un tonu coloráu ya sabor picante na sou variedá roxa, por añadidura de pimentón.

Amás del queisu afuega'l pitu, existen outros productos agroalimentarios nos que'l conceyu de Grau tien un merecíu prestixu. En particular el sou "tocinillo" yá apreciáu polos restauradores de toda España, existiendo nel conceyu dellas empresas esportadoras.

Pola sou parte, la escanda tovía se cultiva en dalgunas fueas del terrazgu de las parroquias interiores, siendo'l sou rústicu pan feichu tradicionalmente nas caserías. Na actualidá, la sou renovada demanda permitíu que nuevamente las panaderías mosconas vuelvan a ofrecellu nos sous escaparates, pudiendo tastiase en dellas mezclas ya variedades.