A mediaos del sieglu XIX, aproximadamente hacia 1848 ya siguiendo trazas d'Andrés Coello, comenzóse a construyir l'actual Ayuntamientu, llevantado sobre'l primitivu de menor tamañu, con escalera esterior ya baxos pa prisión. Yá nel sieglu XVIII construyérase un Consistoriu de dos pisos nel Campu de San Antonio, destruyíu polos franceses en 1809.

Trátase d'un edificiu de planta rectangular de trés pisos, con una torre nel ángulu derechu, onde actualmente aparez el reló. Nos entamos la Torre del Reló tenía armazón de fierru ya construyérase nel añu 1866. L'edificiu sufrió varias reformas a lo llargu de los sieglos XIX ya XX, modificándose la torre ya adquiriendo l'aspeutu actual, tras la última trensformación llevada a cabo pol arquiteutu D. Leopoldo Corugedo, ente los años 1931 ya 1936.

Las murias ábrense n'abundantes ya variaos vanos como, los balcones enmarcaos del primer pisu, los dinteles sobre pilastras del segundu o los arcos de mediu puntu nel pisu superior de la torre. Sobre'l balcón principal destaca l'escudu del Conceyu, nel qu'apaez: un pinu nel que s'apoyen cuatro lanzas con puntas de plata, llevando una serpiente que lu atraviesa ya un cuervu suxetu al so troncu con una cinta, que se posa sobre la serpiente.

Adosáu al Ayuntamientu, llevántase un edificiu de viviendas transformáu en 1930 a partir del proyeutu del arquiteutu municipal D. Leopoldo Corujedo. Tien planta cuadrada con trés pisos ya ángulu torreáu de cuatro. Las sous murias adórnanse con elementos decorativos a base de cartelas, con espeyos y xamasca, ya botones circulares que, xunto col variáu enmarque de los vanos ya repisas de las ventanas, dotan al edificiu de cierta plasticidá. Cúbrese a cuatro aguas, con teya curva sobre ampliu aleru de madera, destacando como recursu decorativu de la torre, los pináculos con bolas.