Estimaos ciudadanos ya ciudadanas de Grau:

Grau yá un conceyu situáu al borde d'un cambiu hestóricu. L'autovía de conexón col Área Central d'Asturias deixóu de ser una aspiración ciudadana ya yá marca la sou güelga nel paisaxe bayurosu de los sous montes ya veigas. Lo que güei yá una firida abierta de desmontes ya perforaciones mañana va ser el vector pol qu'habrán transitar fluxos continuos de personas, mercancías, bienes, servicios, enerxías ya informaciones, soldando la villa a un conxuntu metropolitanu del qu'hasta agora taba al abellugu.

Ventayas, inconvenientes, amenazas ya oportunidades hasta ayeri desconocidas mañana van ser una realidá cotidiana cola que tenemos de convivir. Esti desafiu yá más qu'un retu políticu. Yá un retu ciudadanu del que naide va poder quedase al marxe: empresarios, consumidores, residentes, ausentes, transeúntes... tou un nuevu mapa socioeconómicu al que tenemos d'avezar la nuesa forma de consumir, de producir, y de vivir.

Non permitir que l'impactu d'esta tresformación se produza de mou espontaneu, siguiendo solo una insensible lóxica de mercáu que nun mire pa los efectos sociales ya la marxinación de los que tienen menor capacidá d'adaptación pola mor de la sou situación de partida, va ser el nuesu retu políticu. Pero l'aprovechamientu de las ventayas d'esta tresformación va ser un retu ciudadanu nel que toos, solidariamente, tenemos de tar atentos pa poder prever ya anticipar.

El principiu de participación ciudadana nos asuntos públicos, necesario siempre, garra la sou verdadera dimensión énte los grandes acontecimientos. Nesti sentíu, la constitución del Conseyu de Desarrollu Llocal de Grau, nel que participan partíos, sindicatos, asociaciones d'empresarios, de muyeres, de mocedá, medioambientalistas, culturales, deportivas, educativas, etc., va constituir l'entemez de tol espectru de la sociedá moscona que, al traviés de la ellaboración del Plan Estratéxicu de Grau, va permitir facer del futuro de Grau lo que la sociedá pretenda, ya non lo qu'imponga la deriva.

Esi futuru de nuevas tecnoloxías ya mercaos tradicionales, de productos llocales ya mercaos globales, de sociedá cohesionao nun mundu intercomunicáu, naguamos por que sea lo qu'ufiertemos cola escorzuna de güei a las xeneraciones qu'habrán venir.

Con esti I Plan Estratéxicu de Grau pretendemos consiguilo. Poro, convido a toos ya a toas a participar nesti empeñu, al empar qu'aprovecho estas llinias p'agradecer l'aportación personal que caún faiga pa que'l nuesu porgüeyu se traduza nun éxitu colectivu... ya nun éxitu ciudadanu.

A toos, un candial saludu

Un Plan Estratéxicu yá un documentu ellaboráu ya pactáu polos axentes sociales ciudadanos que diseña'l futuru d'una ciudá ya afita compromisos pa llevalu a cabu.

L'autovía va inxertar la villa nun espaciu metropolitanu de más de 800.000 habitantes. Los desafíos ya las oportunidaes qu'acarreta ameritan un esfuerzu a comuña, conocíu ya concertáu por toos p'aprovechar las sous ventayas ya torgar los sous perxuicios.

Un plan estratéxicu pa Grau representaría afitar un PACTU CIUDADANU sobro lo que tien que ser la villa ya'l conceyu Grau nun futuru inmediatu, diseñando ya aceptando tolos axentes sociales lo que s'habría facer pa consiguilo.

Los representantes de los axentes sociales forman grupos ya comisiones de trabayu asesorados ya guiados por una empresa consultora especializada nesti tipu de procesos de participación ciudadana.

El Plan Estratéxicu de Grau fáenlu los axentes sociales:

Un pactu ciudadanu pa la realización d'un Plan que tolos axentes sociales se comprometen a cumplir ya facer cumplir, asumiendo l'esfuerzu de vindicación énte terceros como acuerdu llocal del futuru de la ciudá.