Ubicación: calle Eduardo Sierra, 10. Grau

Ye un palaciu urbanu del sieglu XVIII, propiedá de la Marquesa de Fontela; cuenta amás con capiella y un xardinin zarráu por una muría de diseñu. L'edificiu ye de planta rectangular, con tres pisos xebraos por una llinia d’ imposta y bufarda superior, presenta los muríos llucíos y pintaos, mentanto les esquineres y alredor de los vanos, repartios éstos de mou regular, son de piedra llabrao.

La fachada principal distribuí de mou regular los vanos, dellos con balcones de forxa. Nel primer pisu vense dos escudos nobiliarios, ún a cada llau del balcón central; nos llaterales hai balcones acristalaos, que son obra d’una igua recién. La capiella, que ta llibre de cultu, ye d'una dómina posterior al palaciu; pol estllu paez obra del arquitectu D.Miguel de la Guardia.

El primer escudu ye’l d’armes de D. Álvarez de Bandujo; tien un campu partiu y presenta nel cantón de la mandrecha un árbol y un perru amarráu al pie, y nel de la manzorga un sol oriáu de rayos. El segundu escudu , de la Casa de Solares, ta cuarteláu en cruz: nel cantón de la mandrecha, na parte superior, hai un castiellu con delles llances arimaes a él, y na parte d'abaxo l'axedré que, si s’ interpreta como un xeroglíficu cruzáu, quier decir" soldaos, a les armes"; nel cantón de la manzorga vease na parte superior un sol y na parte inferior un aigia con dos cabeces y les esnales abiertes. Entrambos escudos asitiólos nesti llugar Dña. Gloria Fontela Campomanes nel entamu’l sieglu XX, darréu que foran esguazaos poles tropes de Bonaparte en 1808.