El Camín de Santiagu - ayto-grado
El Camín de Santiago
Rutas para coche, bicicleta y rutas de senderismo
Senderismo - bicicleta - caballo
Percorríu
Peñaflor - San Playu - Grau - San Xuan de Villapañada - El Freisnu
Información
El Camín de Santiago Primitivu - tamién nomáu "interior" ou d'"Alfonsu II El Castu" - foi l'itinerariu esclusivu utilizáu polos romeros ente los sieglos IX ya XI, ya anque'l camín principal se treslladóu depués hacia los nuevos territorios reconquistaos, nun dexóu de tar mui frecuentáu, ya asina la ilesia San Salvador d'Uviéu ya la sou Cámara Santa (güei catedral d'Uviéu) sedrían el segundu centru de pelegrinación peninsular más visitáu, remembrando'l conocíu romance de que "El que va a Santiago, e non va al Salvador, hónrale al Criado, e dexa al Señor".
Esti Camín de Santiago Primitivu tien en Grau ún de los sous elementos más notables, pues el vau más importante del bravu ríu Nalón produzse na aldea Peñaflor (Grau), cola ponte, alberguería ya capiella que fonon construyíos por iniciativa real d'Alfonsu VII ya la sou muyer doña Berenguela en 1144. D'esti mou, la sou monumental ponte, l'hospital de pelegrinos xunto cola torre vixilancia ya capiella San Blas asociadas a él - ya güei desapaecíos -, el templu románicu ya la propia aldea de Peñaflor, constitúin un exemplu paradigmáticu ya particularmente bien conserváu de los pueblos, itinearios que surdieron como estructuras de sofitu a las corrientes de pelegrinación qu'apaecienon col descubrimientu de la tumba l'Apóstol. De la importancia escepcional del pasu Peñaflor pa romeros ya caminantes da bon testimoniu, por outra parte, la cartografía hestórica editada dende la Edá Media, que inclúi el fitu de Peñaflor inclusive en mapas que recueyen pouco más que'l centru obispal ovetense, feichu que confirma la importancia estratéxica d'esti llugar.
Dende Peñaflor el Camín de Santiago continúa por San Playu pa entrar na villa Grau, saliendo pol barriu la Cruz au inda conserva'l sou peculiar cruceiru, raru n'Asturias, pero mui frecuente en tierras más occidentales. De la villa continúa'l sou percorríu hacia San Xuan de Villapañada, au se tresnó anguaño un albergue de pelegrinos que da'l relevu al qu'ellí esistía na Edá Media, hasta llegar a l'aldea d'El Freisnu, au se celebra la devoción a la Virxe con fervor los 28 de setiembre de cada añu.